[ALIGN=CENTER]أحب ابومتعب واحب السعوديـّهْ
وانا مواطن في الوطن رافعٍ هامي
اذود عنّهْ صافي القلب والنيَّهْ
لاني على ارضهْ نمتْ كل احلامي
لكنّ نسبة همّْ ميّهْ على ميّهْ
كمْلتْ بداخل قلبي الموجع الدامي
والمشكله إنّ الوطنْ ثروتهْ حيّهْ
مدري اذا فكرت ليه الوطن ظامي؟!!
هذي شوارعنا من سْنين مرثيـّهْ
عجوزْ تشكي من مواجعْ وآلامي
واحياءنا ـ يا برْي حالي ـ تراثيـّهْ
تخطيط من دبرة هلِ المعرفهْ صامي
ربي بلانا بشلةٍ في البلديهْ
لا جدّ في المهنهْ وما بهْ هدفْ سامي
ولـْهمْ مع الكرسي علاقه حميميـّهْ
خاسوا عليها اعوام واعوامْ واعوامي
يا عيشةٍ من صافي العيشْ مخليـّهْ
منها غدا قلبي حزينٍ ومنضامي
الفقر انا جحرهْ وما تبطي الحيـّهْ
عن جحرها عندي على كبدي تنامي
احوالْ تظهرْ لكْ وأحوال مخفيـّهْ
يدري بها من هو على الخلق علامي
يا راتبي ما ضمتـكْ كل شهريـّهْ
كفّي وعينيْ ترقب ودمعها حامي
راح بـْك اجار البيت والدلـّه الحيـّهْ
والبنك كنـّهْ في المحبّهْ حد ارحامي
والتاجر اسعاره سعيرْ وخياليـّهْ
يلعبْ بنا كورهْ ويركلْ بالاقدامي
يرفعْ على كيف الهوى والمزاجيـّهْ
ما همّه اللي في الفقرْ يرضع اوهامي
ياحماية المستهلك السوق محميـّهْ
تحمون فيها الدّابْ ياكِلْ من عظامي
مدري اذا الذمّـهْ مباعهْ ومشريـّه
مدري اذا المسؤولْ فوق الجبلْ نامي
يا هُوهْ يا عالمْ يا إنسْ ويا جِنـّـيـّهْ
فوقي مزونٍ هاطلاتٍ وانا ضامي
البحرْ رمْضا والمسافهْ عصاميـّهْ
خلفي لهيب الشمسْ والنارْ قـدّامي
ما حَـدْ نشدْني هن همومي وبلاويـّهْ
وما حَـدْ سألني عن حياتي عن احلامي[/ALIGN]
[B][ALIGN=CENTER][COLOR=red]حسن بن احمد القرني
h.garni@hotmail.com[/COLOR][/ALIGN][/B]